In Dei nomine. Amen. Anno Domini millesimo ducentesimo nonagesimo octavo, indictione undecima, pontificatus sanctissimi patris domini Bonifacii pape octavi anno quarto, idus (sic) junii, sit universis et singulis, presentibus et futuris tenore presentium publice manifestum, quod vacante prioratu Sancti Pancratii Lewensis, per mortem defuncti Johannis de Avignione, condam prioris prioratus ejusdem, religiosi viri fratres Robertus de Novati, cantor prioratus predicti, et Gualterus, ejusdem loci monachus, ex parte venerabilium et religiosorum virorum supprioris et conventus Sancti Pancratii predicti ad reverendum in Christo patrem, dominum Bertrandum Dei gratia abbatem Cluniacensem specialiter propter hoc destinati, breviarium, capam et palefridum dicti defuncti, prout in Cluniacensi ordine moris esse dicitur et comuniter in eodem consuevit fieri, eidem reverendo patri presentarunt et manualiter tradiderunt, quibus ab eodem patre receptis, ipse reverendus pater ex tunc ante omnia protestationes quasdam suas in scriptis fecit et legit ore tenus in hunc modum: «Protestatur abbas Cluniacensis quod suppriorem et conventum Lewenses pro excusatis non habet, qui breviarium, capam et palefridum defuncti prioris Sancti Pancratii Lewensis citius non miserunt et qui etiam tardius quam debuerint pro habendo priore ad eumdem reverendum patrem miserunt.» Quibus protestationibus sic perlectis, prefatus reverendus pater cum nonnullis prioribus et monacis sui ordinis, deliberatione, ut dicebat, prehabita diligenti super provisione dicti prioratus Sancti Pancratii salubriter facienda, venerabilem virum et religiosum fratrem Johannem de Castronovo, tunc sacristam Lewensem, in priorem prioratus Sancti Pancratii Lewensis prefecit et eum sic prefectum statim ad se vocando, idem reverendus pater ad eumdem fratrem Johannem verbis usus est que secuntur: «Tibi, frater Johannes, domum nostram Sancti Pancratii Lewensis cum pertinentiis suis et juribus committimus tenendam et regendam temporaliter et spiritualiter loco nostri. Tu juras nobis ad sancta Dei evangelia non alienare bona domus nostre Sancti Pancratii; alienata pro posse revocare; jura et jurisdictiones ejusdem manutenere et fovere; inmensam donationem a jure vel a statutis ordinis nostri dampnatam de bonis et juribus dicte domus non facere; nobis, successoribus nostris et ecclesie Cluniacensi matri tue exnunc in antea eris obediens et fidelis; dampnum nostrum aut ecclesie Cluniacensis vituperium aut malum non procurabis nec in hiis cuiquam consenties procuranti; sed ubi dampnum, vituperium vel malum nostrum aut ecclesie nostre Cluniacensis sciveris, illud statim impedies toto posse, aut si impedire non possis, nobis quantocius intimabis, ceteraque omnia et singula que in formula fidelitatis plenius continentur nobis, successoribus nostris et ecclesie Cluniacensi salvabis inviolabiliter et attendes.» Que omnia et singula per eundem reverendum patrem articulatim et distincte recitata et exposita memoratus frater Johannes, prior Sancti Pancratii, per juramentum suum ad sancta Dei evangelia corporaliter prestitum, tacto libro, dicto reverendo patri et per eum suis successoribus abbatibus Cluniacensibus et ecclesie Cluniacensi promisit exnunc inantea firmiter et fideliter observare. Acta sunt hec omnia et singula suprascripta apud Dompnam Petram, in aula domus venerabilis et religiosi viri, prioris de Karitate, Autisiodorensis dyocesis, presentibus religiosis viris, dominis Guidone decano de Karitate, Martino de Yspania phisico, Hugone de Marcio et Artaldo monachis et capellanis dicti reverendi patris, Milone et Gerino monachis et capellanis dicti domini prioris de Karitate, ac magistris Durando de Marcigniaco, Eduensis dyocesis, et Guillelmo de Lingonis clericis, Philippo de Sancto Christoforo domicello et Aldebrando de Luca mercatore et pluribus aliis testibus fide dignis ad premissa vocatis specialiter et rogatis. (Seing) Et ego Gentilis de Ficeclo clericus sacra apostolica et imperiali auctoritate notarius publicus, premissis omnibus et singulis una cum suprascriptis testibus interfui, presens publicum instrumentum requisitus per dictum reverendum patrem inde confeci, publicavi et manu proprie scripsi, meumque signum consuetum una cum sigillis venerabilium et religiosorum virorum dominorum P[etri] de Karitate predicta, Oddonis de Longoponte, Hugonis Sancti Laurentii Aurelianensis, Reinaldi de Dompna Petra, Philippi de Anneto prioratuum priorum, Guidonis decani de Maseraio, Cluniacensis ordinis, et magistri Raimundi de Cammereto, monaci capellani et socii dicti reverendi patris, huic presenti publico instrumento rogatus apposui in testimonium premissorum.